Healthyhome kampiyon sa CABC 2nd Boysen Cup

CEBU, Philippines — Sila si Dexsel Caadan, Mark Paradero ug Ferdinand Tiro mikadlit og 13 puntos matag usa sa dihang gitumba sa Healthyhome ang Plexibond, 72-64, aron sakmiton ang titulo sa kampiyonato sa Cebu Architects Basketball Club (CABC) 2nd Boysen Cup didto sa Benedicto College-Cebu City Campus gym ning bag-ohay pa lamang.

Si Caadan midugang og walo ka rebounds, lima ka assists, usa ka steal ug usa ka block, samtang si Paradero dunay usa ka rebound, upat ka assists ug usa ka steal aron tabangan ang Heatlhyhome nga mopatigbabaw sa Plexibond sa sikit nga sangka nga naglangkob og tulo ka tabla ug unom ka panagusab-usab sa labaw.

Si Michael Cinco mitagak og 19 puntos, unom ka rebounds, usa ka assist ug usa ka steal samtang si John Buhawe mihipos og 18 puntos, walo ka rebounds, tulo ka assists, usa ka steal ug usa ka block apan nakawang ang maanindot nilang salida alang sa Plexibond.

Sa bugno alang sa ikatulong puwesto, ang Titan yanong mikulata sa Knoxout, 102-57. Si Lemuel Aspacio mipatuasik og 34 puntos uban ang siyam ka rebounds ug lima ka assists aron ibandera ang Titan ngadto sa 45 puntos nga demolisyon sa Knoxout.