Bakit mas mabilis mag-memorize kapag nakatayo?

MAY mga estudyante at empleyadong nagsasabing mas malinaw ang isip kapag sila’y nakatayo habang nag-aaral o nagre-review. Hindi ito haka-haka lamang. May paliwanag dito ang agham kung bakit mas mabilis pumasok sa utak ang impormasyon kapag nakatayo.

Mas gising ang utak kapag nakatayo

Kapag nakatayo ang isang tao, mas aktibo ang sirkulasyon ng dugo. Ibig sabihin, mas mar­aming oxygen ang dumadaloy patungo sa utak. Kapag sapat ang oxygen, mas alerto ang isip at mas mabilis magproseso ng impormasyon na isang mahalagang factor sa memorization.

Iwas antok, mas malinaw ang pokus

Ang pag-upo nang matagal ay kadalasang nagdudulot ng antok at katamlayan. Samantalang kapag nakatayo, naka “alert mode” ang katawan. Dahil dito, mas napipilitan ang utak na manatiling gising at nakatuon sa ginagawa.

Mas aktibo ang memory centers ng utak

Ayon sa ilang pag-aaral, ang bahagyang galaw ng katawan: tulad ng pagtayo o paglakad, ay nakakatulong sa hippocampus, ang bahagi ng utak na responsable sa memorya at pagkatuto. Kaya mas nagiging epektibo ang pag-alala ng impormasyon.

Mas malakas ang mind-body connection

Ang postura ay may epekto sa mental state: mas kumpiyansa, mas alerto, at mas handang tumanggap ng impormasyon. Ito ang dahilan kung bakit may mga guro na mas epektibong magturo habang nakatayo.

Konklusyon

Kung hirap kang mag-memorize habang nakaupo, subukang tumayo habang nagbabasa o nagre-review. Minsan, ang solusyon sa mabagal na pagkatuto ay hindi bagong technique kundi sa simpleng pagtayo.