EDITORYAL - Mga bombang gitugot

Duna gyuy nakabsan sa kinabuhi tungod sa paggamit og pabuto atol sa pagsugat sa Pasko ning tuiga.  Ang namatay 78-anyos na nga lalaki nga matud pa sa report nangunay sa pagdagkot sa Bakus ni Hudas o Judas Belt.

Gawas pa niini, duna say 125 ka mga tawong nabuthan sa klase-klaseng pabuto gikan sa Disyembre 21 hangtud Disyembre 27 sumala pa sa Department of Health.

Matud pa sa DOH , 102 sa mga nangabuthan karong tuiga mga bata diin ang uban kanila nangaputlan gyud og mga tudlo, dunay nangaigo sa mata ug duna say nangabungol tungod sa kakusog sa buto nga ilang nadungog.

Ang maong mga natala nga biktima nagagikan kini sa nagkalain-laing tambalanan sa mga probinsiya sa nasud nga anam-anam nga naabot ang report diha sa ilang ulohang buhatan.

Nagpasabot nga posibleng mosaka pa gyud kini sa dili pa moabot ang Bag-ong Tuig ug posible pa gyung mapun-an sa adlaw na mismo sa selebrasyon pagsugat sa 2025.

Napanglantawan nang daan nga kadaghanon kapilo ang mogamit og pabuto sa pagsugat sa Bag-ong Tuig kun itandi sa pagsugat sa Pasko sama sa mga nangaging mga katuigan.

Ang pabuto nahimo nang tradisyon sa mga Pilipino nga kinopya ra pud gikan sa mga Chinese kaniadto nga maoy nagdala niini dinhi sa nasud.

Kay lagi ang mga Pilipino motuo man og palihi aron pag-abog sa malas pinaagi sa pagsaba-saba, ug para sa uban ang pagpabuto maoy labing epektibo nga palihi.

Apan unsaon nalang man ang mga mabiktima niini nga mga kabataan? Kun maputlan og tudlo o mga kamot, tiil o ba kaha mabuta? Nindot ba kini nga palihi para sa banay?

Husto ang paghulagway sa DOH aning pabuto : Mga bomba nga gitugotan nato gamiton. Maayo lang kun responsable ang nigamit, ang mga bata kaha?