Gipatik sa booklet

Adunay bag-ong Administrative Order nga gipagawas ang Department of Health nga nagmando nga dili na kinahanglanon nga mopresentar sa ilang purchase booklets ang mga senior citizens aron makapahimulos sila sa diskwento matag higayon nga mopalit sila sa ilang tambal.  Dako kining kasayon sa pamaagi aron makadiskwento sa tambal ang mga senior citizen.  Matud pa sa akong silingan, “Mas maayo nga gitangtang na ang booklet.  Malimot na man gani ko kon unsay akong tuyo sa tindahan, padalhon-dalhon pa gyud og booklet.  Labot pa, maglagot ko magtan-aw sa nawong sa politiko nga gipatik gyud sa atubangan sa booklet.”  Madahaan!

Buhi bisan niwang

Segun sa ulahing survey sa Social Weather Station, nagkadiyotay ang mga hamtong nga Pilipino ang nagtuo nga “malipayon” ang ilang Pasko karong tuiga kon itandi sa miaging tuig. Dili ikahibulong kining resulta sa survey.  Kinaiya nato ang paglambigit sa ang atong kalipay sa mga materyal nga butang, busa dayag nga daghan kanato ang magmasulob-on.  Hinuon, aduna gihapo’y pipila kanato nga kontento ra sa ilang kahimtang ug nakasinati gihapon og kalipay taliwala sa kakabos.  Haum ang panahom sa akong silingan nga nag-ingon, “Bahala’g niwang basta buhi.” Pagkatoytoy!

Walay ipalit og kerosene

Agi’g mensahe ni Presidente Marcos sa kapaskohan, nanawagan siya kanato’ng mga Pilipino nga unta magkinabuhi kita nga puno sa kahulogan ug katuyoan ug nga unta mamahimo ang matag usa nga kahayag nga magdala’g paglaum alang sa uban.  Maanindot kon matuman ang panawagan sa Presidente.  Apan sa kamahal sa kerosine karon, morag lisod tumanon ang maong panawagan kay wala man kita’y ikapalit og gas nga ilahutay sa pagbanwag og kahayag.  Maparehas na lang unya kita sa danghag nga mga babaye sa bibliya nga nahutdan og lana mao nga wala makasulod ni makaapil sa kumbira.  Fezteleern!

 Pasayloa ko’s inyong sala

Alang kang Bise Presidente Sara Duterte, ang pasko maoy panahon sa pagpinasayloay, pagkamanggihatagon ug paghigugmaay.  Giawhag usab niya ang katawhang Pilipinhon nga ipatigbabaw ang pagbinatiay ni’ng panahona.  Ang mensahe sa bise presidente gihimo luyo sa panagbingkil niya ug sa mga miyembro sa administrasyon. Busa dakong tanghaga kon unsaon niya pagpangayo og pasaylo, subay sa iyang panawagan.  Moingon na lang tingale siya ngadto ni Romualdez ug mga kaubanan nga, “Pasko man karon mao nga pasayloa na lang ko sa INYO’NG sala.” Madahaan!

Aksyon og kabalaka?

Adunay purohan nga ang kagamhanan sa dakbayan sa Sugbo modagan ubos sa re-enacted budget sunod tuig kon mapakyas ang konseho sa pagpalabang sa 2025 budget karon Biyernes, Desiyembre 27, 20224.  Sulagma ba kaha o tinukmod sa kahigayonan nga ang administrasyon ni Mayor Alvin Garcia gihulagway sa pulong nga nagsugod sa “aksyon.”  Una, misugod siya nga “acting mayor.”  Dayon iyang gihulagway ang iyang kaugalingon nga usa ka “action mayor.” Bisan pa man ni’ng kalambuan, wala hinoon mo-“aksyon” og kabalaka ang mayor. Fishkots!