Tricycle nag-dive: 2 bata patay, 6 sugatan

BATANGAS, Philippines — Dalawang bata ang kumpirmadong patay habang anim pa ang sugatan matapos mahulog ang sinasakyan nilang tricycle sa 30-talampakang lalim na gilid ng kalsada sa bayan ng Mataas na Kahoy, dito sa lalawigan, noong Linggo.

Kinilala ang mga nasawing biktima na sina Carl Benedict Potian Brillates, 12, estudyante, residente ng Barangay Sabang, Lipa City, at Briegh Daniel Embrado Potian, 4-taong gulang, ng Barangay Nangkaan, Mataas na Kahoy, Batangas.

Sugatan naman ang anim na sakay ng tricycle kabilang ang 1-taong gulang na sanggol, na mabilis na naisugod sa Metro San Jose Medical Center at San Jose District Hospital para lapatan ng lunas.

Ayon sa report, minamaneho ng 41-anyos na driver ang tricycle habang sakay ang kanyang mga kamag-anak nang maganap ang insidente bandang alas-11:00 ng umaga. 

Binabagtas umano ng sasakyan ang mahabang pababang bahagi ng kalsada nang bigla itong mawalan ng preno pagsapit sa isang malalim na kurbada sa Brgy. Kinaglagan.

Dahil dito, nawalan ng kontrol ang driver hanggang sa bumangga sa bakal na barindilya at tuluyang nahulog sa gilid ng kalsada na nasa 30-talampakan ang lalim. Bumagsak ito sa sementadong daan sa harap ng mga kabahayan sa ilalim ng mainroad.