Road rage: Jeepney driver kinatay ng tandem!

MANILA, Philippines — Dahil sa away kalsada, patay ang isang jeepney driver mula sa kamay ng riding-in-tandem na nakaalitan nito sa kalsada, kamakalawa ng gabi sa Santa Rosa City, Laguna.

Dead-on-the-spot ang biktima kinilala lang sa alyas “Mar”, nasa hustong gulang, driver ng pampasaherong jeepney, nang magtamo ng dalawang malalim na saksak sa katawan.

Tumakas naman ang mga suspek na kinilala sa mga alyas “Angelo” at alyas “Uwey”.

Sa ulat ng pulisya, alas-7:40 ng gabi habang bumabagtas ang jeep ng biktima sa Purok Dita sa Santa Rosa City at sinusundan nito ang motorsiklo lulan ng magkaangkas na suspek. Huminto umano sa gitna ng kalsada ang motorsiklo na ikinagalit ng biktima.

Bunsod nito, agad bumaba sa kanyang jeep ang nasabing driver upang komprontahin ang mga suspek subalit paglapit nito ay agad siyang inundayan ng mga saksak saka sila mabilis na humarurot patakas.

Duguang bumagsak ang biktima na agad nadala ng mga responders sa pagamutan subalit idineklarang dead-on-arrival.