911 hotline pinalakas sa Central Luzon

MANILA, Philippines — Higit pang pinalalakas ng Central Luzon Police ang pagresponde sa mga emergency calls sa 911 hotline.

Ito ay dulot nang mahigit 400 na bagong radyo na magagamit ng mga pulis sa lugar sa pagresponde sa mga emergency tulad ng mga reklamo, krimen at iba pa.

Ayon kay Police Regional Office 3 Regional Director PBrig. Gen. Ponce Rogelio Peñones Jr., nakabili sila ng 455 handheld radios na ipamamahagi sa iba’t ibang police stations sa Central Luzon para higit pang mapaigting ang emergency response sa rehiyon.

Una nang dumating ang 300 radios noong unang bahagi ng Hulyo, habang kadarating lang nitong linggo ang karagdagang 155 units.

Inaasahan naman na madaragdagan pa ang mga handheld radio ng PRO 3 sa tulong na rin mga lokal na pamahalaan na nagpahayag ng suporta sa programa ng PNP.