2 gun dealer utas sa shootout

COTABATO CITY, Philippines — Dalawang hinihinalang illegal gun dealer ang patay matapos umanong manlaban at makipagbarilan sa mga awtoridad sa Datu Abdullah Sangki, Maguindanao del Sur kahapon ng umaga.

Sa magkahiwalay na pahayag ng mga senior officials ng Maguindanao del Sur Provincial Police Office at ni Brig. Gen. Romeo Juan Macapaz, director ng Police Regional Office-Bangsamoro Autonomous Region, kinilala ang mga napaslang na sina Norsalam Ulama at Norsama Muntok.

Ang dalawang suspek ay idineklarang dead-on-the-spot dahil sa tinamong tama ng mga bala sa iba’t ibang bahagi ng kanilang katawan.

Ayon sa local officials at police investigators mula sa ulat sa radyo na unang pinaputukan ng baril umano nina Ulama at Muntok ang tropa ng mga sundalo ng 33rd Infantry Battalion ng Philippine Army nang tinangka nilang patigilin habang lulan ng isang sasakyan sa isang checkpoint sa Purok 1, Barangay Old Maganoy, Datu Abdullah Sangki para sa plain view inspection sa kanilang behikulo.

Napag-alaman na nakatakda sanang ideliber nina Ulama at Muntok ang isang M16 assault rifle at isang .45 caliber pistol sa kanilang buyer sa isang lugar sa Datu Abdullah Sangki, nang maganap ang shootout.