Kagawad binoga sa ulo sa tapat ng Barangay Hall

CAVITE, Philippines — Kritikal sa pagamutan ang isang Brgy. Councilor makaraan itong barilin sa ulo habang nakaupo sa tapat mismo ng kanilang Barangay Hall, kamaka­lawa ng gabi sa Brgy. Amaya Tanza Cavite.

Kinilala ng pulisya ang biktima na si alyas Emilio, 54-anyos, kagawad at residente ng Brgy. Amaya 3, Tanza, Cavite.

Nakilala naman ang suspek na si alyas “Andy”, nasa hustong gulang, resi­dente ng Brgy. Amaya 3, Tanza, kasalukuyan ng pinag­hahanap ng pulisya.

Batay sa imbestigasyon, alas-11 ng gabi nang maganap ang insidente, nakaupo ang biktima sa tapat ng kanilang Brgy. Hall nang biglang dumating ang suspek sakay ng tricycle.

Agad na bumaba ang suspek at binaril nang malapitan sa ulo ang biktima na ngayo’y nakikipag-agaw buhay sa ospital.

Sa pagsisiyasat ng pulisya, lumalabas na nakaalitan ng suspek ang pamangkin ng biktima.