2 obrero tepok sa underground fuel tank!

COTABATO CITY, Philippines — Dalawang manggagawa ang patay habang isa pang ksamahan ang nasa malubhang kalagayan sanhi ng suffocation at posibleng gas poisoning sa loob ng isang underground petroleum storage tank sa Barangay Curuan, Zamboanga City na kanila sanang lilinisin bago tatakpan ng semento nitong umaga ng Miyerkules.

Kinumpirma ng Zamboanga City local government unit at ng mga opisyal ng Police Regional Office-9, ang pagkasawi nina Joel Dungog, 34-anyos, at ang 30-anyos na si Jomar Cagit sa naturang insidente.

Kasalukuyan namang ginagamot sa ospital ang isa pang biktima na si Jonas Calderon, 23-anyos.

Sa ulat, unang nahulog sa loob ng fuel tank, matapos buksan ang isang masikip na entrance contraption ng fuel storage ng isang gas station sa Barangay Curuan ang manggagawang si Calderon. Agad namang binabaan sa loob nito nina Dungog at Cagit para tulungan si Calderon saka inalalayang makaakyat palabas bago sila isa-isang nawalan ng malay sanhi ng kanilang pagkalanghap ng gas fumes.

Parehong wala nang buhay sina Dungog at Cagit nang maiahon ng mga rumespondeng tauhan ng Zamboanga City Disaster Risk Reduction and Management Office (CDRRMO) mula sa loob ng naturang fuel storage tank na nakabaon sa lupa.

Kaugnay nito, nanawagan ang mga barangay officials sa Curuan kay Zamboanga City Mayor John Dalipe at sa Department of Labor and Employment (DOLE) na nakabase sa naturang lungsod na pagbayarin ng danyos ang may-ari ng Phoenix Station sa mga pamilya ng dalawang nasawi dulot ng posibleng kapabayaan.