6 miyembro ng pamilya, nilamon ng lupa
Himalang nakaligtas
MANILA, Philippines — Anim na miyembro ng isang pamilya ang nasugatan matapos ma-trap sa loob ng kanilang nawasak na bahay sa nangyaring landslide sa Sitio Simona, Brgy. San Isidro, Taytay, Rizal,kamakalawa.
Ayon sa Taytay MDRRMO, nasa loob ng kanilang bahay ang magkakapamilya na binubuo ng mag-asawa at apat na mga tinedyer na anak nang gumuho ang mataas na bahagi ng lupa sa likuran ng kanilang bahay dakong, alas-3:45 ng hapon.
Kinilala ang mga biktimang sina Marlon Tiburcio, 45; kanyang asawang si Mylene Tiburcio, 37, at kanilang mga anak na sina Yamchie, 17; Jamaica, 16; Shanaya, 11; at Ashley, 10; pawang residente ng Sitio Simona, Brgy. San Isidro,Taytay na pawang naka-confine sa Rizal Provincial Hospital System.
Ayon sa MDRRMO, lumambot ang lupa dahil sa walang tigil na pag-ulan na naging sanhi ng pagguho nito.
Nagtamo ng mga pinsala ang mga biktima at matapos ma-rescue ng magkakatulong na mga rescuer ng MDRRMO, PNP at BFP agad isinugod ang mga ito sa Rizal Provincial Hospital System at nilalapatan pa ngayon ng lunas.
- Latest
