Pera ng kumpanya naipatalo sa online sabong, kolektor arestado!

Nag-report pa sa pulis na naholdap

MULANAY, Quezon, Philippines — Inaresto ng mga otoridad ang isang microfinance collector matapos na maipatalo nito sa online sabong ang collection money ng kanyang kumpanya sa bayang ito, kamakalawa.

Ayon sa ulat, nagtungo pa ang suspek na si alyas “Jayson”, may sapat na gulang sa himpilan ng Mulanay Municipal Police Station at nagreklamo na siya umano ay naholdap subalit nakitaan siya ng paiba-ibang pahayag.

Sa huli ay inamin din ng suspek na intensyonal nitong itago ang nasabing collection money na nagkakahalaga ng mahigit ?166,000.

Samantala, noong hatinggabi ng Hunyo 4 ay narekober na ang bag ng suspek na naglalaman ng transaction documents at pera na nagkakahalaga na lamang ng ?42,000.

Nasa kustodiya na ng Mulanay Police Station ang suspek na nahaharap ngayon sa kasong Qualified Theft.