Magpinsan tepok sa kidlat, 1 pa kritikal

SAMAL, Bataan , Philippines — Dalawa ang patay habang isa naman ang kritikal sa pagamutan matapos tamaan ng kidlat ang isang magpapamilya sa Brgy. Palili ng bayang ito kamakalawa ng tanghali.

Kinilala ng pulisya ang mga nasawing biktima na sina Kevin Sacris, 21- anyos at pinsan na si Elvin Sacris, 26-anyos, habang kritikal sa pagamutan ang kanilang tiyuhin na si Eddie Sacris, 40-anyos; pa­wang residente ng na­banggit na lugar.

Ayon kay Gregorio Odis na siyang may-ari ng lupa kung saan natagpuan ang mga biktima, sunod-sunod umano na malalakas at matatalim na kidlat ang gumuhit sa kalangitan bandang alas-12 ng tanghali.

Nang kanyang siyasatin ang lugar ay ilan sa mga puno ng niyog ay natapyas dahil sa pagkidlat hanggang sa tumambad na sa kanya ang tatlong nakahandusay na mga Sacris.

Wala na umanong buhay sina Kevin at Elvin habang si Eddie nang matagpuan ay kaagad na isinugod sa pagamutan.