Negosyante dawit sa drug trade, itinumba
CAMP VICENTE LIM, Laguna, Philippines — Isang negosyante na sangkot umano sa drug trade ang pinagbabaril ng dalawang hindi kilalang lalaki na nagkunwaring kustomer habang nasa loob ng kanyang tindahan sa Rosario, Batangas kamakalawa ng hapon.
Kinilala ni Major Carlo Caceres, hepe ng Rosario Police ang biktima na si Rodel Alegria ng Brgy. Puting Kahoy, Rosario, Batangas.
Ayon kay Caceres, dakong ala-1 ng hapon habang abala sa loob ng kanyang tindahan si Alegria nang dumating ang dalawang lalaki na nagpanggap na mga customer at binaril sa ulo ang biktima na agad nasawi sa insidente.
Nang makitang napuruhan ang negosyante, mabilis na naglakad ang mga suspek patakas.
Sinabi ni Caceres na tinitingnan na ng kanyang mga tauhan ang motibo na “double cross” at “drug related” sa naturang krimen.
Aniya, ang biktima ay nasa Tokhang list sa barangay at base sa imbestigasyon ay patuloy ang ginagawa nitong mga illegal na aktibidad sa droga.
- Latest
