Lalaking wanted sa 157 kasong rape, nasakote
MAGALLANES, Cavite, Philippines — Isang 42-anyos na lalaki na nahaharap sa 157 bilang ng kasong rape at 42 bilang ng kasong acts of lasciviousness sa lalawigan ng Pangasinan ang naaresto ng mga otoridad sa bayang ito,kamakalawa ng gabi.
Kinilala ng pulisya ang suspek na si Geminiano Argon Jr.,alias Boboy,42, kasalukuyang naninirahan sa Brgy. Poblacion 4, Magallanes, Cavite.
Sa nakalap na ulat mula kay P/SSG Eddie P Gomba ng Magallanes Police, nagtungo sa kanilang himpilan ang ilang miyembro ng Pangasinan pulis at humingi ng koordinasyon dala ang 178 piraso ng warrant of arrest laban sa suspek.
Agad na nagkasa ng operation ang pulisya at dakong alas-6:00 ng gabi nang matiyempuhan ang suspek sa tinutuluyan nito at inaresto.
Hindi na nakapalag ang suspek nang posasan ito ng pulisya. Nakatakdang dalhin sa Pangasinan ang suspek upang litisin sa patong patong na kasong panggagahasa.
- Latest
