Mag-asawa nirapido, patay

CAVITE, Philippines - Pinabulagta ang mag-asawa makaraang pagbabarilin ng mga hindi kilalang lalaki sa loob ng kanilang bahay sa Manhattan Residences sa Barangay Habay 1, Bacoor City, Cavite kamakalawa ng gabi. Base sa police report na nakarating sa Camp Pantaleon Garcia nanonood ng telebisyon ang mag-asawang Benhur Alab, 33; at Hanadie Tuwanadato, 37, nang pasukin at ratratin ng dalawang lalaki na naka-helmet bandang alas-9:30 ng gabi. Nang masigurong patay na ang mag-asawa  ay mabilis na tumakas ang gunmen sakay ng motorsiklo. Narekober sa crime scene ang walong basyo ng bala ng cal. 45 pistol. Sinisilip naman ng pulisya ang anggulo na posibleng may kinalaman sa droga at personal na alitan ang isa sa motibo ng gunmen.