Ex-mayor, 4 pa tiklo sa arms cache

PAMPANGA , Philippines - Arestado ang dating alkalde at apat pang iba makaraang makumpiskahan ng droga at arms cache sa isinagawang operasyon ng mga tauhan ng PNP Special Action Force at Criminal Investigation And Detection Team CIDT-3 sa  Alonzo Subd. sa Barangay Cacutud, bayan ng Arayat, Pampanga kahapon ng umaga.

Sa police report na nakarating kay ni P/Chief Insp. Reynold Macabitas, hepe ng CIDT-3, pormal na kinasuhan ang mga suspek na sina ex-Arayat Mayor Luisito “Chito” Espino, 56; Chairman Rosendo Dizon ng Barangay Cacutud; Romy Mallari y Manalo, 42; Rosauro Dillera Jr. y Santos, 35; at si Cesar Peralta y Buan, 25.

Nabatid na sumiklab ang isang oras na putukan makaraang lumaban ang mga suspek kung saan nasu­gatan ang isa sa miyembro ng PNP SAF na si P02 Robert Ron Fernandez.

Sinalakay ang nasabing lugar sa bisa ng search warrant na inisyu ni Judge Ana Marie C. Joson-Viterbo ng RTC Branch 24, Cabanatuan City sa Nueva Ecija.

Ayon pa kay Macabitas, si Espino ang tumatayong lider ng Espino Criminal Gang na sinasabing sangkot sa robbery/hold-up. Contract killing, gun running at drug trade sa nasabing lalawigan.

Nasamsam sa bahay ni Espino ang ibat ibang uri ng armas, mga bala, 19 plastic sachet na shabu at assorted drug paraphernalia.