Nag-amok todas; 4 kritikal

LEGAZPI CITY, Albay, Philippines – Kasalukuyang nakikipaglaban kay kamatayan ang magpinsan at dalawang bata makaraang pagtatagain ng 22-anyos na binata na  sinasabing tinopak kaya nag-amok sa Barangay Pinanaan, bayan ng Aroroy, Masbate kahapon ng umaga. Ginagamot sa Masbate Provincial Hospital ang mga biktimang sina Maricel Besimo, 32; pisang si Romeo Besimo, 43; Marny Besimo, 9; at si Arne Besimo Jr. 7; mga residente sa nabanggit na barangay. Samantala, napatay naman ang nag-amok na si Christian Milla matapos itong hatawin ng kahoy ng sumaklolong kamag-anak ng mga biktima. Sa ulat ng pulisya na nakarating sa Camp Simeon Ola, pinasok ng suspek ang bahay ng mga biktima saka isinagawa ang pananaga. Nagawang tumakbo palabas ng bahay ang mag-iina kahit sugatan hanggang sa saklolohan ng isa sa kamag-anak na si Yanly Besimo kung saan napatay nito ang nag-amok magtapos hatawin sa ulo.