2 patay sa killer truck

NORTH COTABATO, Philippines – Magkasabay na sinalubong ni kamatayan ang magkaibigang nakamotorsiklo matapos itong salpukin ng truck sa kahabaan ng national highway sa Barangay Malasila sa bayan ng Makilala, North Cotabato kahapon ng madaling araw. Kinilala ang mga  biktima na sina Roderick Ramos ng Brgy. Kisante; at Ryan Ray Nokorda ng Brgy. Malasila. Sa inisyal na imbestigasyon ni PO1 Arnold Dalion, magkaangkas sa motorsiklo ang dalawa patungong Barangay Kisante nang mag-overtake ito sa sinusundang sasakyan. Gayon pa man, nakasalubong ang truck na minamaneho ni Prolyn Serrano Franciquete kaya naganap ang trahedya. Nahaharap sa kasong kriminal ang 38-anyos na driver ng truck na construction materials na pag-aari ng Nagazat Hardware.