Misis dinedo ng holdaper

CAVITE, Philippines – Napatay ang 27-anyos na misis matapos itong pagbabarilin ng dalawang di-kilalang holdaper sa kahabaan ng Bulihan Road sa bayan ng Silang, Cavite kamakalawa ng gabi. Sa police report na isinumite sa Camp Pantaleon Garcia, nag-withdraw ng malaking halaga sa remittance center ang biktimang si Gemelyn Radam saka sumakay ng traysikel kasama si May Ann Alonzo nang harangin ng riding-in-tandem gunmen. Gayon pa man, tumangging ibigay ni Radam ang kanyang shoulder bag na naglalaman ng mala­king halaga kaya siya niratrat at napatay. Tinamaan naman ng ligaw na bala ng baril si Alonzo na nasa malubhang kalagayan. Pinaniniwalaang nasundan ng mga holdaper ang biktima mula sa remittance center kaya isinagawa ang panghoholdap.