Guro itinumba ng tandem

CEBU, Philippines – Bulagta ang 33-anyos na elementary teacher matapos itong ratratin ng motorcycle-riding-gunmen sa kahabaan ng highway sa Barangay Panadtaran, bayan ng Argao, Cebu noong Linggo ng hapon. Napuruhan sa ulo at likurang bahagi ng katawan ang biktimang si Allan Campaner Albert, teacher sa Usmad Elementary School sa nasabing barangay. Ayon kay PO3 Benjamin Geyrozaga, pauwi na ang biktimang nagmomotorsiklo ng sundan at pagbabarilin ng riding-in-tandem assassins pagsapit sa nasabing barangay. Narekober sa crime scene ang dalawang basyo ng bala ng cal .45 pistol kung saan nangangalap naman ng impormasyon ang pulisya mula sa mga nakasaksi sa krimen. Sinisilip naman ng mga imbestigador ang anggulong personal na alitan ng biktima laban sa gunmen. Freeman News Service