Misis nilikida sa harap ng mister

BULACAN, Philippines – Napatay ang 23-anyos na misis matapos itong pagbabarilin sa harap ng kanyang mister sa bisinidad ng Barangay Salacot, bayan ng San Miguel, Bulacan kamakalawa ng hapon. Napuruhan sa dibdib ang biktimang si Doreen Hulleza habang hindi naman idinamay ang mister nitong si Virgilio Paguio, 34, kapwa nakatira sa Barangay Sta. Ines sa nabanggit na bayan.

Gayon pa man, sa impormasyong nakalap ng pulisya mula sa mister ng biktima ay nadakip naman ang pangunahing suspek na si Ronnie Rueda, 53, magsasaka, ng Barangay Lambakin sa nasabing bayan.

Sa ulat na nakarating kay P/Supt. Nathaniel Villegas, magkaangkas sa motorsiklo ang mag-asawa nang harangin ng suspek.

Pinuntirya ang biktimang duguang bumulagta habang nakaiwas naman ang mister nito at nakahingi ng tulong sa mga barangay tanod. Narekober sa crime scene ang ilang basyo ng bala ng cal. 45 pistol habang nasamsam naman sa suspek ang baril na ginamit sa krimen.