Shabu queen na bagong piyansa, huli uli sa droga

TUGUEGARAO CITY, Philippines – Nasakote sa ikalawang pagkakataon ang tinaguriang “Shabu Queen” ng Cordillera na kapa-piyansa lamang noong nakaraang buwan sa kasong illegal drugs matapos pagbentahan ng mahigit P50,000 halaga ng shabu ang isang sekreta ng Philippine Drug Enforcement Agency­ sa Palma Ville, Barangay Puguis, La Trinidad, Benguet kamakalawa. ?

Kinilala ni PDEA Cordillera Regional Dir. Allan Ricardo ang naaresto na si Revila Domingo Waclin alyas Bella, 29, tubong Buguias, Benguet.

Ayon kay Ricardo, 15.2215 gramo ng shabu ang nasamsam ng PDEA agents kay Waclin na kalalaya lamang matapos makapag-piyansa sa kasong pagtutulak na isinampa sa kanya noong Agosto.?

Si Waclin ay pinuno ng Bella Drug Group na nasa talaan ng PDEA watchlist sa rehiyon. ?

Samantala, arestado rin si Rudy Bogya Bag-ay, 54, alyas Ruben Bogya Mariano matapos mahulog sa isinagawang buy bust operation ng PDEA sa Barangay Sto. Rosario Road, Baguio City. Pitong plastic sachets ng shabu na nagkakahalaga ng P7,000 at mga drug paraphernalia ang nasamsam ng mga sekreta sa pagiingat ng suspek.