Tanod itinumba ng tandem

BULACAN, Philippines – Pinabulagta ang 50-anyos na barangay tanod matapos itong barilin ng riding-in-tandem gunmen sa harapan ng tindahan sa Barangay Bongga Menor, bayan ng Bustos, Bulacan kamakalawa ng hapon. Isang tama ng bala ng cal.45 pistol sa ulo ang tumapos sa buhay ni Raul Gatuz ng nabanggit na barangay. Sa imbestigasyon ni PO2 Gideon Vera, nakikipagkuwentuhan ang biktima sa kaibigang lalaki sa harap ng tindahan nang lapitan at barilin sa ulo bandang alas-5:30 ng hapon. Hindi naman idinamay ang kaibigan ng biktima na sinasabing natulala sa nasaksihang pamamaril. Kaagad na tumakas ang gunmen patungo sa direksyon ng Barangay Tanawan habang patuloy naman ang imbestigasyon.