Benguet tragedy: 13 patay, 3 sugatan

TUGEUGARAO CITY, Cagayan, Philippines  - Aabot sa 13-katao kabilang ang 12-estudyante ang magkakasunod na sinalubong ni kamatayan makaraang mahulog ang Ford Fiera type jeep sa may 300 talampakang lalim na ba­ngin sa matarik na highway sa Barangay Bangbangay-yen, bayan ng Buguias, Benguet noong Martes ng hapon.

Sa police report na nakarating kay P/Chief Insp. Fernando Botangen, hepe ng Buguias PNP, kabilang sa namatay on-the spot ay ang driver ng Ford-Fiera type jeep na si Efren Dalisdis, at ang mga estudyanteng sina Jera Flair Mayao, 15; Maricel Basatan,13; Jera Madiano,15; Sheribeith Simeon,12, Jasmine Lestino,15; Minerva Menzi,16; at si Angie Aguien,15.

Idineklara namang patay sa Lutheran Hospital ang mga biktimang sina Mheljoy Agustin,15; Yvone Bestre,13; John Ray Dalisdis,16; Mari Faith Lamsis,15; at si Charee Bestre, 15, namatay naman habang ginagamot sa Baguio General Hospital.

Kasalukuyan namang isinasalba ang buhay sa Baguio General Hospital ang mga biktimang sina Reyshan Latuwed,18; at Jamerose Bankin, 15; habang si Elejoy Agpayasa, 17, ginagamot sa Lutheran Hospital.

Lumalabas sa imbestigasyon na nakahimpil ang Ford Fiera type (ABF-436) sa tabi ng highway na paakyat upang magbaba sana ng tatlong pasahero subalit bumigay ang preno kaya bumulusok paatras sa malalim na bangin.

Karamihan sa pasahero ng sasakyan ay mga estud­yanteng pauwi mula sa Pob­lacion National High School.