Rapist itinumba ng NPA

LEGAZPI CITY, Albay, Philippines – Pinabulagta ang 35-anyos na magsasakang may nakabinbing kasong rape makaraang pagbabarilin ng mga rebeldeng New People’s Army  kamakalawa ng umaga sa Barangay Guindawahan, bayan ng Pio V. Corpuz sa Masbate. Sa ulat ng pulisya, naganap ang pamamaril dakong alas-10:30 ng umaga habang ang biktimang si Christopher Ancero ay nagpapakain ng alagang kalabaw may ilang metro ang layo sa kanyang bahay. Napuruhan sa ulo ang biktima habang palakad na tumakas ang gunman na animo’y walang naganap na pamamaril. Sa tala ng pulisya, ang biktima ay may warrant of arrest sa kasong rape na ipinalabas ni Judge Domingo B. Maristela Jr. ng Cataingan Regional Trial Court Branch 49 ng Masbate.