13-anyos nasermunan, nagbigti

CAMP SIMEON OLA, Legazpi City, Philippines – Pinaniniwalaang dinamdam ng 13-anyos na totoy ang matinding sermon ng kanyang ina kaya nagdesisyong magbigti sa bodega na pag-aari ng kanyang lola sa Brgy. Balocawe, bayan ng Dimasalang, Masbate kamakalawa ng gabi. Bandang alas-6 ng gabi nang matagpuang nakabitin ang biktimang si Dan Kenneth Bislumbre, Grade 6 pupil sa Balocaew Elementary School. Napag-alaman na bago ang pagpapatiwakal ng biktima ay sinasabing nasermunan muna ito ng kanyang ina na si Liezel dahil sa nasira nito ang portable speaker ng kanyang pinsan. Gayon pa man, walang imik na umalis sa kanilang bahay ang biktima at hindi na ito makita hanggang sa matagpuan ng kanyang pinsan ang nakabiting katawan ng bata.