Trader ng palay hinoldap

NUEVA ECIJA, Philippines – Aabot sa P.27-milyon ang natangay ng dalawang armadong lalaki makaraang holdapin ang 53-anyos na negosyante ng palay sa Barangay Catalanacan sa Muñoz City, Nueva Ecija kamakalawa ng umaga. Kinilala ng pulisya ang biktima na si Oscar Parocha ng Barangay Caloocan, San Jose City. Base sa police report, lulan ng trak ang biktima para mamili ng palay nang harangin at holdapin ng dalawang di-kilalang lalaki na sakay ng motorsiklo pagsapit sa nabanggit na barangay. Malaki ang paniniwala ng biktima na may kinalaman sa insidente ang isang alyas Alfie na sinasabing kausap nito sa pamimili ng palay dahil tinatawagan nito sa cell phone ay hindi na sumagot.