Magsasaka binoga

TUGUEGARAO CITY, Philippines - Patay ang isang 37 anyos na magsasaka matapos itong barilin ng desabog ng kainuman nitong konsehal ng Brgy.  Karikkikan Norte, Ilagan City, Isabela kamakalawa.


Kinilala ni Isabela Police Spokesman Supt. Narciso Paragas ang biktima na si Roberto Jimenez, samantalang ang suspek ay si Kagawad Ernie Ramos na pawang taga Brgy. Siffu.


Lumalabas sa imbestigasyon na nagyaya ng inuman ang nasabing konsehal sa kanyang farm sa Karikkikan Norte at sa sobrang lango sa alak ay inilabas nito ang kanyang baril na desabog at nagpaputok sa ere.


Tinangkang agawin ng biktima ang baril at pinagsabihan ang pasaway na kagawad.

Bunga nito ay lalong nagalit ang suspek  na napagbuntunang pagbabarilin ang biktima ng ilang beses sa iba’t-ibang bahagi ng katawan na ikinamatay nito.

Pinaghahanap na ng mga awtoridad ang tumakas na suspek.