Estudyante grabe sa saksak ng kaklase

MANILA, Philippines - Dahil sa hindi pagtulong sa paglilinis sa klasrum, nasa kritikal na kalagayan ang 12-anyos na elementary pupil makaraang saksakin ng kanyang kaklase sa labas ng eskuwelahan sa Agdao, Davao City, Davao­  kamakalawa ng hapon.

Patuloy na nakikipaglaban kay kamatayan sa Southern Philippine Medical Center ang biktimang itinago sa pangalang Roman ng Jose Porras Elementary School sa nasabing lungsod.

Samantala, pinaghahanap naman ang suspek na itinago sa pangalang Boyet.

Ayon sa imbestigasyon, nagkasagutan ang biktima at ang suspek dahil sa hindi pagtulong ng una sa paglilinis sa kanilang silid-aralan kung saan kapwa ang mga ito itinalagang tagapaglinis.

Nabatid na sa halip na tumulong sa paglilinis ay naglaro umano ang biktima kaya nagalit ang suspek bunsod upang abangan nito at pagsasaksakin sa labas ng kanilang eskuwelahan.

Ang biktima ay nagtamo ng tatlong tama ng saksak sa likuran at isa naman sa kaniyang kamay.