Parak huli sa indiscriminate firing

BULACAN, Philippines – Inaresto ang isang aktibong pulis ng kaniyang kabaro matapos na ireklamo ito ng walang habas na pamamaril sa ere  sa loob ng isang kilalang subdivision sa Brgy.Loma de Gato, Marilao, Bulacan kamakalawa ng gabi.

Kasong administratibo at kriminal ang kinakaharap ng suspek na si PO1 Michael Almonte, 31, nakatalaga sa Quezon City Police District (QCPD) Station 2 at residente ng Florida Villas, Brgy. Loma De Gato, Marilao.

Sa ulat ni Supt. Gerardo Andaya dakong alas- 9:30 ng gabi, nag-iinuman ang suspek at mga kamag-anak ng kaniyang ka-live in sa nasabing lugar hanggang sa magtalo ito at ang kinakasama.

Nairita ang suspek na agad binunot ang kaniyang baril at nagpaputok ng apat na beses sa ere.

Nagresponde naman ang mga operatiba ng pulisya at nasakote ang suspek na nasamsaman ng isang Taurus 9 MM nabaril na may apat na basyo ng bala.