Truck bumaliktad: 1 dedo, 7 sugatan
MANILA, Philippines - Nasawi ang 26-anyos na mister habang pitong iba pa ang nasugatan makaraang bumaliktad ang sinasakyang truck sa kahabaan ng highway sa Manduarriao District, Iloilo City, Iloilo kamakalawa.
Idineklarang patay sa Iloilo Doctors Hospital ang biktimang si Ryan Sijo ng Badiangan, Iloilo kung saan nagtamo ng grabeng sugat sa ulo at iba pang bahagi ng katawan.
Kabilang sa mga sugatang biktima ay sina Joven Estribor, Jessie Rafil, Ervan Gatoteo, Jay Nomong, Ronald Sampil, Dionisio Cobol at si Jerry Parreño.
Sa police report na nakarating kay P/Senior Supt. Marieto Valerio, director ng Iloilo City PNP, ang mga biktima ay manggagawa ng negosyanteng si Clemente Abordo ng Abordo Rice Mill sa bayan ng Janiuay.
Lumilitaw na iniwasan ng driver ng truck na si Fernando Baylen ang isang taxi na biglang kumaliwa sa highway kaya nawalan ito ng kontrol sa manibela.
Sumalpok ang truck sa poste ng kuryente at punungkahoy sa may highway bago tuluyang bumaliktad at gumulong ng ilang ulit.
Nahaharap naman sa kasong reckless imprudence resulting to homicide at multiple physical injuries ang driver ng truck.
- Latest
