Mister pinatay sa inuman

BULACAN, Philippines – Pinaniniwalaang nagkapikunan sa biruan kaya sinaksak at napatay ang 35-anyos na mister ng kanyang kainuman sa Brgy. Tiaong sa bayan ng Guiguinto, Bulacan kamakalawa ng hapon. Napuruhan sa dibdib ang biktimang si Francisco Llagas, habang naaresto naman sa follow-up operation ang suspek na si Noel Reaño, 42, kapwa nakatira sa Sitio Ugong sa nasabing barangay. Sa imbestigasyon nina SP01 George Lopez at P02 Sonny Berboso, magkasama sa inuman ang suspek at biktima nang magkapikunan na humantong sa hamunan ng suntukan. Napayapa naman ng ilang kalalakihan ang dalawa subalit nagawang saksakin ng suspek ang biktima bago tumakas. Naaresto ang suspek sa Bulacan Provincial Hospital matapos masaksak ng biktima sa pakikipag-agawan sa hawak na patalim.