2 dakma sa drug den

MANILA, Philippines - Kalaboso ang binagsakan ng dalawa-katao matapos madakma ng mga tauhan ng Philippine Drug Enforcement Agency sa inilatag na operation sa sinasabing drug den sa Cagayan de Oro City kamakalawa ng umaga. Kinilala ni PDEA Director General Undersecretary Jose S. Gutierrez, Jr. ang mga suspek na sina Reynaldo “Aldong” Montejo, 39, operator ng drug den; at Jocelyn Cabania, 37, kapwa nakatira sa Magsaysay Street, Barangay 17, Cagayan de Oro City. Napag-alamang naunang nasakote si Montejo sa inilatag na buy-bust operation kung saan nakumpiskahan ng 7-plastic sachet ng shabu, ilang drug paraphernalia at motorsiklo na gamit sa kanilang modus operandi. Samantala, si Cabania na kapitbahay ni Montejo ay inaresto rin dahil nasa loob ito ng drug den.“Karamihan sa mga parukyano ng drug den ni Montejo ay mga  jeepney driver at manggagawa sa nasabing lugar,” pahayag ni Gutierrez.