TUGUEGARAO CITY, Philippines - Pinaniniwalaang matinding selos ang umiral kaya pinugutan ang 22-anyos na saleslady ng kanyang ka-live-in sa Barangay Patul, Santiago City, Isabela kamakalawa.
Natagpuan sa bakanteng lote ang bangkay ng biktimang si Rosalia Timo habang tinutugis naman ng pulisya ang suspek na nakilala lamang sa pangalang Boy Rustico na kapwa nakatira sa nabanggit na barangay.
Nabatid na nagkaroon ng matinding pagtatalo ang magka-live-in kaugnay sa kumakalat na tsismis na maraming nahahalinang mga kasamahang lalaki sa ganda ng biktima.
Huling namataan ng mga kapitbahay ang biktima na hinahabol ng suspek na may bitbit na pangkatay na kutsilyo kung saan biglang naglaho sa dilim ang dalawa.
Natagpuan ng ilang residente ang bangkay ng saleslady na walang ulo sa bakanteng lote.