BULACAN, Philippines – Dahil sa kakulangan ng traffic enforcer na magpapatupad ng daloy ng trapiko ay isa na namang matandang babae ang iniulat na nasawi matapos mahagip ng pampasaherong bus sa bayan ng Marilao, Bulacan kahapon ng umaga. Kinilala ng pulisya ang biktima na si Isabelita Peñalosa ng Barangay Tañgos, Navotas City, habang sumuko naman sa pulisya ang drayber na si Joseph Pandac, 47, ng Barangay FVR sa bayan ng Norzagaray, Bulacan. Sa imbestigasyon ni PO2 Marlon Torres, lumilitaw na patungo ang biktima sa Devine Mercy Church sa Brgy. Sta. Rosa 1,Marilao nang mahagip ng Santrans Bus (PWP172) habang tumatawid ito. Sinasabing nakipagkarera ang bus ni Pandac sa isa pang bus kaya nahagip sa kaliwang bahagi ang biktima bago nagulungan.