SAN JOSE CITY, Nueva Ecija, Philippines – Dalawang karnaper ang inaresto ng pulisya matapos makumpiskahan ng nakaw na motorsiklo sa kahabaan ng Maharlika Highway sa Barangay Abar 1st, San Jose City, Nueva Ecija kamakalawa ng gabi. Pormal na kinasuhan ng pulisya ang mga suspek na sina Diego “Siyete” Gregorio, 20, ng Zone 4 Junior Campo, Barangay Sto. Niño 2nd; at Jeremy Valdez, 41, ng Purok Pinagcuartelian, Barangay Sto. Niño 2nd. Nabawi sa mga suspek ang itim na motorsiklo (8083-XC) na pag-aari ni Antonio Escueta, 65, ng Irene Ville Subdivision, Barangay San Isidro, Cabanatuan City. Ang dalawa na naaresto sa inilatag na checkpoint ay sinasabing tumangay ng motorsiklo ni Escueta noong Biyernes ng gabi (Mayo 4) sa Freedom Park, Burgos Avenue, Barangay Sangitan West, Cabanatuan City.