Driver binoga ng holdaper

OLONGAPO CITY, Philippines - Malubhang nasugatan ang drayber ng pampasaherong jeepney ng isa sa dalawang nangholdap sa kanyang pasahero kamakalawa ng gabi sa Otero Avenue sa Barangay Mabayuan, Olongapo City. Kasalukuyang nasa James Gordon Memorial Hospital ang biktimang si Noel Ulanday, 40, ng West Bajac-Bajac, Olongapo City. Sa ulat ni P02 Juliver Punzalan na isinumite kay P/Senior Insp. Zaldy Lising, lumilitaw na hinoldap ng dalawang di-kilalang lalaki ang dalawang pasahero ni Ulanday. Gayon pa man, tinangkang itigil ang sasakyan at saklolohan ni Ulanday ang dalawa ngunit binaril siya sa leeg ng isa sa holdaper. Kahit sugatan ay nagawang ibiyahe ni Ulanday ang jeepney patungo sa nasabing ospital para magpagamot. Alex Galang at Randy Datu