Most wanted arestado

Obando, Bulacan, Philippines  – Bumagsak sa mga awtoridad ang isa sa tatlong salarin at no.9 most wanted na responsable sa kasong pagpatay sa isang lalaki noong 2005 matapos na makorner ng mga awtoridad habang namamasada ng pampasaherong jeepney sa bayang ito kahapon.

Kinilala ni Chief Inspector Lorenzo Paynor ang suspek na si Glenn “Salot” Alvarico, 34, driver, tubong San Carlos, Pangasinan at residente ng Brgy. Panghulo ng naturang munisipalidad.

Bandang alas-2 ng hapon ng masakote ang suspek matapos na may makapag-tip na kamag-anak ng pinaslang nitong si Bernabe Bondoc, 33-anyos, ng nasabi ring lugar na namamasada ito ng jeepney sa lugar.

Ang suspek ay dinakip sa bisa ng warrant of arrest na inisyu ni Judge Gregorio Sampaga ng Regional Trial Court Branch 78 sa Malolos City sa kasong murder sa biktimang si Bondoc at walang inirekomendang piyansa sa kaniyang kalayaan.

Magugunita na si Bondoc ay pinaslang noong Hulyo 8, 2005 nang pagbabarilin ng mga suspek na armado ng M16 rifle matapos itong ikasal.