Nagpakalat ng pekeng P1k dakma

BULACAN  ,Philippines – Pinaniniwalaang nagkalat sa Bulacan ang pekeng P1,000 matapos masakote ang isa sa dalawang miyembro ng sindikato na nagpapakalat ng pekeng pera sa ilang tindahan sa Barangay Lolomboy sa bayan ng Bocaue, Bulacan kamakalawa ng gabi.

Kinilala ni P/Supt. Elvis Diaz, ang nadakmang suspek na si Ernesto San Luis Jr., 26, ng Signal Village habang tugis naman ng pulisya ang ikalawang suspek na si Alvin Co, 28, ng Barangay Bicutan, Taguig City. Sa police report na isinumite kay P/Senior Supt. Fernando Mendez Jr. dinakma ang suspek matapos natuklasan ng may-ari ng tindahan na si Ricardo Marcelo na peke ang ibinayad na limang tig-P1,000 kapalit ng mamahaling PSP. Narekober sa suspek ang ilang mamaha­ling gamit na binili sa ibang tindahan na pinaniniwalaang mga pekeng P1,000 ang ibinayad.