SOLANO, Nueva Vizcaya, Philippines – Nananatili pa ring isolated ang limang bayan ng Ifugao matapos matabunan ng mga malalaking tipak ng bato at putik ang mga pangunahing kalsada dahil sa magkasunod na bagyong Pedring at Quiel noong nakaraang linggo. Ayon sa ulat, nananatili pa ring sarado ang mga kalsadang palabas at papasok sa mga bayan ng Tinoc, Hungduan, Aguinaldo, Asipulo at Mayoyao matapos maputol ang ruta ng transportasyon. Maliban sa mga landslide na tumabon sa mga pangunahing kalsada ay nananatili pa rin na walang kuryente sa lalawigan matapos maputol at mawasak ang mga poste ng elektrisidad. Ayon kay Ifugao Gov. Eugene Ballitang, bagama’t hindi pa natutukoy ang pinsala na idinulot ng magkasunod na bagyo ay isasailalim nila sa state of calamity ang buong lalawigan.