MALOLOS CITY, Philippines – Malagim na kamatayan ang sinapit ng mag-ina sa kamay ng isang pulis matapos nitong pasukin ang bahay ng mga biktima sa bayan ng Pulilan kamakalawa ng gabi.
Kinilala ni Supt. Myrna Reyes, hepe ng pulisya ng bayan ng Pulilan ang suspect na si SPO3 Marciano Mag-isa.
Ang mga biktima ay nakilalang sina Remedios Guinto, 68 at ang kanyang anak na si Enrico Guinto, kapwa residente ng Brgy. Balatong-B, Pulilan.
Ang mga biktima ay nagtamo ng maraming tama ng bala mula sa kalibre 45 pistola, at isinugod sa Good Shepeherd Hospital ngunit idineklarang dead-on-arrival.
Batay sa imbestigasyon ng pulisya, pinasok ng suspek ang bahay ng mga biktima bandang alas-8 noong Lunes ng gabi kung saan agad na pinaulanan ang mag-ina ng putok ng baril na naging sanhi ng kanilang kamatayan. Agad din namang naaresto ang suspect ng mga rumespondeng pulis.