CAVITE, Philippines – Nabalot ng misteryo ang pamamaslang sa isang 22-anyos na lalaki na sinasabing binaril habang nakakulong sa barangay hall sa kasong panununtok sa isang waiter sa Barangy Tanzang Luma 2 sa bayan ng Imus, Cavite kamakalawa ng gabi.
Napuruhan sa ulo si Renante Ramirez, tubong Surigao at nakatira sa Barangay Binakayan, Kawit, Cavite. Sa ulat na nakarating kay P/Senior Supt. Danilo Maligalig, lumilitaw na dinala ng mga opisyal ng barangay si Ramirez sa Barangay Hall para ikulong sa kasong panununtok sa waiter ng GStar Bar sa Barangay Palico 4 sa nabanggit na bayan. Nabatid na pansamantalang iniwan ng ilang opisyal ng barangay ang nakakulong na si Ramirez.
Ganun pa man, hindi pa nakalalayo ay umalingawngaw ang malakas na putok ng baril kaya muling bumalik ang mga barangay opisyal kung saan bumungad sa kanila ang duguang katawan ni Ramirez.
Nalalagay naman sa balag ng alanganing makasuhan ang mga opisyal ng barangay dahil sa kapabayaan.