MANILA, Philippines – Dalawa katao kabilang ang isang 7-anyos na batang lalaki ang nasawi matapos malunod nang tangayin ng malakas na agos ng tubig baha sa magkakahiwalay na lugar sa bayan ng Tubay, Agusan del Norte, ayon sa ulat kahapon.
Sa report ng Police Regional Office (PRO) 13, kinilala ang mga biktima na sina Ricarte Ganzan, 70, magsasaka ng Brgy. Binuangan at Reyan Bahan, 7, ng Brgy. Dona Rosario; pawang ng bayan ng Tubay.
Ang bangkay ni Ganzan ay natagpuang lumulutang sa baybayin ng Brgy. Binuangan sa Tubay nitong Biyernes dakong alas-8 ng umaga matapos itong magtungo sa kanilang bukirin noong Huwebes .
Samantalang bandang alas-2 naman ng hapon ng lumutang ang bangkay ni Bahan sa isang sapa sa kanilang lugar.
Ang bata ay huling nakitang naglalakad bandang alas-4 ng hapon habang tumatawid sa Kalooy creek sa gitna ng malakas na pagbuhos ng ulan.
Nabatid na ang patuloy na mga pagbaha sa lugar ay sanhi ng tail end ng cold front na nararanasan sa ilang rehiyon ng bansa.