MANILA, Philippines - Nagbuwis ng buhay ang isang ama matapos na manlaban sa mga armadong kidnaper na dumukot sa kanyang anak na batang babae sa kahabaan ng national highway sa Brgy. Poblacion sa bayan ng Pigkawayan, North Cotabato kahapon ng umaga.
Napatay ang negosyanteng si Allan Tamayo habang dinukot naman ang anak nitong si Krisalda Tamayo, elementary pupil sa Montessori School sa Pigkawayan.
Lumilitaw na bandang alas-6:45 ng umaga ay lulan ng motor ang mag-ama patungong eskuwelahan nang harangin ng mga kidnaper sa kahabaan ng national highway ng Brgy. Poblacion.
Nanlaban naman si Allan nang sunggaban ng mga kidnaper ang kaniyang anak kaya binaril ito sa tiyan.
Kasunod nito nawalan ng kontrol sa manibela ang driver ng getaway vehicle (MAD) 808 pagsapit sa Brgy. Manuangan, kaya nadakip ng pulisya ang driver ng mga kidnaper.
Nagawa namang makatakas ng iba pang mga kidnaper tangay ang bata na tumahak patungo sa direksyon ng kagubatan.
Ayon naman kay Major Marlowe Patria, deputy spokesman ng Army’s 6th Infantry Division (ID), natukoy ang grupo ng mga kidnaper matapos na magpadala na ng demand letter sa pamilya ni Tamayo.
Nakasaad sa demand letter ang halaga ng ransom kapalit ng kalayaan ng biktima.