Tumanggi sa tagay, kinatay

MANILA, Philippines - Kamatayan ng isang 42-anyos na obrero ang ginawa nitong pagtanggi sa pakikipag-inuman sa kabarangay matapos na pagtatagain kamalawa ng gabi sa Sitio Ibaba, Barangay Camflora ng bayan ng San Andres, Quezon.

Hindi na halos makilala si Diolito Nunez dahil sa mga sugat sa mukha at katawan habang tinutugis naman ng pulisya ang suspek na si Marlon Cabugwas, 24, mangingisda.

Ayon kay PO2 Ronnie Cataquiz, may-hawak ng kaso, dakong alas-6:30 ng gabi nang makipag-inuman ng alak sa suspek kung saan tinawag naman ng kanyang misis.

Ipinasyang umuwi ng biktima subalit sinundan ito ng suspek at muling inakit na makipag-inuman.

Nang tumanggi ang biktima ay hinabol ito ng saksak ng suspek hanggang sa mahulog sa palayan at tinuluyang ma­patay.