BULACAN, Philippines — Napaslang ang sinasabing katiwala ni Mayor Eduardo “Jonjon” Villanueva matapos pagtulungang gulpihin ng dalawang senglot na lalaki sa bisinidad ng Barangay Bunlo sa bayan ng Bocaue, Bulacan kahapon ng madaling-araw.
Halos mapisak ang mukha at mga mata ni Joevello Diamante, 52, habang nakakulong naman ang mga suspek na sina Michael Pascua, 32, tubong Brgy. Barat, Umingan, Pangasinan at Almario Abricio, 32, tubong Brgy. Malitbog, Southern Leyte at kapwa nakatira sa nabanggit na barangay.
Sa ulat na nakarating kay P/Senior Insp. Ronie Pascua, nagtungo ang dalawa sa tindahang pag-aari ni Mayor Villanueva subalit tinanggihan dahil sa kapwa lango na sa alak. Gayon pa man tinangkang payapain ng biktima ang dalawang senglot matapos itong magsisigaw sa may-ari ng tindahan.
Kasunod nito, pinagbalingang gulpihin ng dalawang senglot ang biktima kung saan naisugod pa ito sa Bulacan Provincial Hospital subalit namatay din. Nalugmok ito sa sementong sahig at patuloy pa din ang ginawang panggugulpi sa biktima.