P3.5-milyong cocaine nasamsam
CAMP VICENTE LIM, Laguna , Philippines – Umaabot sa P3.5-milyong halaga ng cocaine ang nasamsam sa isang notoryus na tulak ng bawal na droga sa isinagawang buy-bust operation ng pulisya sa bayan ng San Pedro, Laguna kamakalawa ng hapon.
Pormal na kinasuhan ang suspek na si Lea Millares, 30, ng #24 St. Southern Height Phase 1, Barangay Langgam, San Pedro, Laguna.
Ayon kay P/Senior Supt. Manolito Labador, Laguna police director, naunang ireklamo ng mga residente ang paglaganap ng bawal na droga at mga adik sa kanilang lugar kung saan sinasabing pangunahing nagpapakalat ng droga ay si Millares.
Dito na bumuo ng pangkat si Labador para magsagawa ng pagmomonitor at kasabay nito ay ang buy-bust operation laban kay Millares.
Nasamsam kay Millares ang 700 gramo ng cocaine na nakabalot sa papel na may packaging tape.
Mahaharap sa kasong paglabag sa Republic Act 9165 o anti-drug law ang suspek na kasalukuyang nakapiit sa San Pedro police station.
- Latest
- Trending
