BATANGAS, Philippines – Napaaga ang salubong ni kamatayan sa magkaibigan kabilang ang close-in bodyguard ng vice mayor makaraang ratratin ng mga ’di-pa kilalang lalaki kamakalawa ng gabi sa Barangay Mabalanoy sa bayan ng San Juan, Batangas.
Personal na alitan ang isa sa motibo kaya napaslang sina Arvin Sayat, 33, ng Barangay Abung at Ruel Jimenez, 34, ng Barangay Sampiro, San Juan, Batangas.
Samantala, tinamaan ng ligaw na bala ang barangay councilor na Melchor Tejada ng Barangay Mabalanoy sa bayan ng San Juan.
Sa ulat ni P/Senior Supt. Alberto Supapo, Batangas police director, lumilitaw na katatapos lang mag-inuman ng alak ni Sayat na close-in security escort ni San Juan Vice Mayor Arthur Marasigan at Jimenez sa maliit na karinderya at papasakay na ng kanilang kotse nang lapitan at pagbabarilin ng dalawang maskaradong lalaki bandang alas-7 ng gabi.
Bulagta kaagad sina Sayat at Jimenez samantalang nagtamo naman ng tama ng bala ng baril sa tiyan at braso si Tejada.
Palakad na lumayo ang dalawang killer patungo sa ’di-pa malamang direksyon.
Narekober ng pulisya sa crime scene ng isang slug at 18 basyo ng cal.45 pistola. Arnell Ozaeta