MANILA, Philippines - Sinunog ng pitong armadong kalalakihan na nagpakilalang mga rebeldeng New People’s Army ang isang backhoe na pag-aari ng isang alkalde matapos nilang salakayin ang isang minahan sa Barangay Mapawa, Surigao City, Surigao del Norte, ayon sa ulat kahapon.
Batay sa report ng Police Regional Office 13, naganap ang insidente sa mining site ng Greenstone Resources Corporation sa Sitio Sto. Nino, Barangay Mapawa, Surigao City dakong alas-11 ng umaga.
Ayon sa imbestigasyon, bigla na lamang lumusob sa lugar ang pitong mga armadong rebelde.
Walang nagawa ang mga bantay at empleyado dito matapos na tutukan ng baril ng mga armadong rebelde.
Agad na binuhusan ng gasolina at sinindihan ng mga rebelde ang isang unit ng backhoe-TX-115 Samsung na pag-aari ni Mayor Cesar Diaz ng Tagana-an, Surigao del Norte. Joy Cantos